1889...((ويالمفحط اتبع ابـو زقـم واحسـن خاتمتهـا ))

بــــــسم الله الرحمـن الرحـيم

هذي القصيده..،
عن احووال الشبااب والهجوولـه..،
واتررككـم مع القصيده..،





لسوال اللي طرح نفسه وقبل ايـة سوالـي
موضة التفحيط في جيل الشبـاب وشاخرتهـا

امرح العود وعقبه لثوبـه صغيـر العيالـي
واخـذ المفتـاح وكلـم شلتـه واكـد نعتهـا

وسرا فوق الموتر اللي لا حرام ولا حلالي
والعجوز تحـوس غمتهـا مقابـل منظرتهـا

ولو يقول العود كلمه راح معها في شكالـي
بلوةٍ وليا فتحـت فمهـا ماتطبـق حنجرتهـا

من سمعها قال ذي فالتربيه مضرب مثالـي
وهي لو تسرح لها في عنز جـات مضيعتهـا

المهـم انـه قطـع الكـم اشـاره مايبالـي
وكافها وسط الحـواري ليـن تفلـت عافيتهـا

وصفَها مع شلة التفحيط في منظـر خيالـي
ويدٍ تصفـر ويـد تومـي وتلقـط كيمرتهـا

واشهر التفحيط لا فاز النصر والا الهلالـي
اسهرو ليـل الريـاض تمـر ليلـه مانستهـا

جا المفحط والفليشر يشتغل والنـور عالـي
وقام يزو الكـاوي عقـده ويطبـق سلسلتهـا

مرةٍ تمشـي ورا وتقـول ولياهـا عدالـي
من رصيف ليا رصيف ولا تشوف الا غبرتها

والمسجل صوته اعلى شي ابو نوره يلالـي
ونورها يكشف على الجمهور مع ميل نغمتهـا

تبترم به بينهم وتقول بـه فـي كـل جالـي
وكم من سيـارةٍ بالرفـرف الخلفـي زوتهـا

وصفق الجمهور من زود الوناسه والهبالـي
وعاود الكرَه ولا تسمع سوى صوت كفرتهـا

واختلف في وضعه وطاح الشماغ مع العقالي
والزقاره من فمه طاحت على الثوب قطفتهـا

وافلت الطاره وقامت تبترم مـن دون والـي
وطارت من الخط للجمهـور علـى تنديتهـا

اولعت في بديها النيران صار الها اشتعالـي
ولا وصل رجل الدفاع الا بعد انها احرقتهـا

وفرو الجمهور عنها صابهـم منهـا جفالـي
صادة اللي صادته واللي سلـم مـن قابلتهـا

من نجا ذاليوم بكره تدركـه مابـه جدالـي
كم نفوس من التهـور والجهـل قـد اكلتهـا

موجزٍ عن ما نشوف وشدني والكـل غالـي
ويالمفحط اتبع ابـو زقـم واحسـن خاتمتهـا
والنهاية كل ابـو يفطـن لنفسـه والعيالـي
وان حكت ام العيـال يحـط ايدينـه فرقبتهـا